Өндірісте күрделі құрылыстарды, үйлерді немесе машиналарды жобалау жұмыстары, әдетте олардың кескіндерін қағаздың бетіне түсіруден басталады. Мұндай кескіндерді сызба деп атайды. Сызба белгілі бір техникалық пікірді жарыққа шығаруда негізгі құжат және адам ойын білдіруде еш нәрсемен салыстыруға болмайтын бірден-бір құрал болып есептелінеді, сондықтан сызбаны техниканың тілі дейді. Сол тілді жетік меңгеруде, сызбаны дұрыс салуда, және оларды еркін оқи білуде сызба геометрияның маңызы өте үлкен. Бұл туралы атақты профессор В.И.Курдюмов (1853-1904) былай деген: Егер сызба техника мамандарының екінші тілі болса, онда сызба геометрия–бұл тілдің грамматикасы, өйткені сызба сөздердің орнына сызықтар мен нүктелерді пайдалана отырып, басқа біреулердің ойларын дұрыс ұғынуға және өз ойларымызды басқа біреуге дұрыс түсіндіруге көмектеседі.