Жаңалықтар

QS Quacquarelli Symonds халықаралық рейтинг агенттігі бірнеше рейтингтің құрастырушысы болып табылады:

• әлемнің үздік университеттерінің рейтингі - QS World University Rankings;
• әлемдегі үздік университеттердің пәндік рейтингтері - QS World University Rankings by Subject;
• тұрақты даму мақсаттарына қол жеткізу саласындағы әлемдегі үздік университеттердің рейтингі - QS Sustainability Rankings;
• QS University Rankings by Region (Еуропа, Латын Америка, Азия, Араб аймағы) үздік университеттерінің аймақтық рейтингтері;
• әлемдегі ең жақсы студенттік қалалардың рейтингі - QS Best Student Cities;
• үздік MBA және магистратура бағдарламаларының рейтингі - QS MBA and Masters Rankings;
• QS Stars бағдарламасы.

 2024 жылы 6 қарашада QS агенттігі QS Asia ranking 2025 рейтингісінің нәтижесін жариялады. Auezov University Азияның 985 жоғары оқу орындарының арасында 138 орынға ие болды. Өткен жылмен салыстырғанда ЖОО 6 позицияға көтерілді.

           Биылғы жылы Азияның үздік университеттерінің рейтингісіне 35 Қазақстандық ЖОО кіреді, бұл еліміздің бүкіл тарихындағы жоғары білімнің абсолютті рекорды болып табылады. 22 Қазақстандық ЖОО өз позицияларын жақсартты, 3 жоғары оқу орны өз орнын сақтап қалды, 1 университет бір жылдық үзілістен кейін рейтингте қайта оралды.

            Еліміздің жетекші үш жоғары оқу орны рейтингтің бірінші жүзінде орналасқан, оған әл-Фараби атындағы Қазақ ұлттық университеті мен Л. Н.Гумилев атындағы Еуразия ұлттық университетімен қатар қазір 89-шы орында тұрған Satbayev University кіреді.

              QS Asia University Rankings рейтингісін жасау кезінде сарапшылар Азия университеттерін 11 критерий бойынша бағалайды: ғылыми сарапшылар мен жұмыс берушілер арасындағы беделі, ғылыми жарияланымдарға сілтеме жасау, профессорлық-оқытушылар құрамы мен ғылыми дәрежесі бар қызметкерлер саны, халықаралық зерттеу желісі, ғалымдардың жарияланымдық белсенділігі, шетелдік студенттер мен ғалымдардың саны және студенттердің профессор-оқытушы құрамға қатынасы және студенттердің академиялық ұтқырлығы. Азиядағы ең үздік жоғары оқу орындарының ТОП-150 қатарына кіру – біздің университет үшін маңызды жетістік.

Жалпы, әлемнің үздік университеттерінің – QS World University Rankings флагмандық рейтингісінде Қазақстандық жоғары оқу орындарының саны соңғы төрт жылда екі еседен астам өсті, ал соңғы үш жылда 14-тен 21 университетке дейін бір жарым есеге өсті. М.Әуезов атындағы ОҚУ осы рейтингте 621 орынды және Республика бойынша 4 орынды иеленді.  Рейтингке барлығы 106 елден әлемнің 5663 жоғары оқу орны қатысты, оның  ішінде 1503-і рейтингке ие болды.

           Пәндік рейтингтерде Қазақстандық жоғары оқу орындарының саны төрт жыл ішінде төрт есе өсті (2 ЖОО-дан 8 ЖОО-ға дейін). М.Әуезов атындағы Оңтүстік Қазақстан университеті 2024 ж. алғаш рет «Қазіргі тілдер» пәні бойынша  QS  by Subject әлемнің үздік университеттерінің пәндік рейтингісіне еніп, 301-340 орынға ие болды.

        QS Sustainability Rankings - Тұрақты даму мақсаттарына қол жеткізу саласындағы әлемнің үздік университеттерінің рейтингісі ерекше орын алады, оның соңғы шығарылымында бірден 12 Қазақстандық ЖОО дебют жасап, "Басқару моделі" индикаторы бойынша барынша сенімді нәтижелерді көрсетті. Бұл рейтингте М. Әуезов атындағы ОҚУ әлемнің 1403 жоғары оқу орнынан 981-1000 орын алды. Қазақстан Республикасы бойынша университет өткен жылдағыдай  12 университетінің ішінен 4-ші орында. QS Sustainability 2024 Asia аймақтық рейтингісінде университет аймақтағы 478 ЖОО-ның ішінде 293-ші орында.

         QS Stars бағдарламасына қатысушы Қазақстандық жоғары оқу орындарының саны соңғы үш жылда 23 – ке дейін өсті. Бағдарлама әрбір университеттің беделі мен ғылыми өнімділігінен бастап инклюзивтілік пен тұрақты дамуға қосқан үлесіне дейінгі ерекше күшті жақтарын анықтайтын тәуелсіз аудит нәтижелерінің арқасында еліміздің жетекші университеттеріне шетелден дарынды студенттер мен оқытушылар құрамын тартуға жаңа мүмкіндіктер береді. Рейтинг қорытындысы бойынша Әуезов университеті 4 жұлдызды жоғары рейтингке ие болды. QS Stars аудитінің нәтижелері бойынша университетке келесі көрсеткіштер бойынша ең жоғары рейтинг – бес жұлдыз берілді: «Оқыту», «Жұмыспен қамту», «Онлайн оқыту» және «Инклюзивтілік».

               Сондай-ақ Қазақстан әлемдегі ең үздік студенттік қалалар рейтингісінде – QS Best Student Cities Rankings рейтингінде ұсынылған, оған қазірдің өзінде елдегі екі қала: Астана мен Алматы кіреді.

Жоғарыда аталған рейтингтердің соңғы екеуінде – QS Global MBA Rankings және QS Best Student Cities Rankings – Орталық Азия елдері арасында тек Қазақстан ғана көрсетілген.

          Университеттің жаһандық және аймақтық рейтингтердегі жетістіктері университет ұжымы мен оның студенттерінің үйлесімді және жан-жақты жұмысының көрінісі болып табылады.